როგორ შექმნეს Meta-მ, Google-მა და Amazon-მა თანამედროვე ინტერნეტი

Meta: როცა ვები “გაცოცხლდა”

დიდი ხანია ის დრო წარსულს ჩაბარდა, როდესაც ვებ-გვერდები სტატიკური, უსიცოცხლო დოკუმენტები იყო. ადრე ყოველი პატარა მოქმედება – იქნებოდა ეს ფოტოს მოწონება, კომენტარის დაწერა თუ გვერდზე გადასვლა – ბრაუზერისგან გვერდის სრულ გადატვირთვას მოითხოვდა. შესაბამისად, მომხმარებელი მუდმივად ლოდინის რეჟიმში იმყოფებოდა. Meta-მ (მაშინდელმა Facebook-მა) ეს ბარიერი ფუნდამენტურად მოშალა.

მათმა საინჟინრო გუნდმა React.js შექმნა – JavaScript-ის ბიბლიოთეკა, რომელმაც ვებ-დეველოპმენტში ნამდვილი პარადიგმის ცვლა გამოიწვია. Meta-მ ინტერნეტს “კომპონენტური არქიტექტურა” აჩუქა. ეს ნიშნავს, რომ ვებსაიტი აღარ აღიქმება როგორც ერთი მთლიანი, მოუქნელი ფურცელი, არამედ როგორც დამოუკიდებელი, მოაზროვნე ნაწილების ერთობლიობა. წარმოიდგინეთ, რომ საიტის თითოეული ღილაკი, საძიებო ველი თუ პოსტი ცალკეული აპლიკაციაა, რომელიც მხოლოდ მაშინ იცვლება, როცა ამის საჭიროება ჩნდება.

ამ ტექნოლოგიამ დეველოპერებს საშუალება მისცა, ისეთი ინტერფეისები შეექმნათ, რომლებიც მომხმარებლის ქმედებაზე, ყოველგვარი დაყოვნების გარეშე, მომენტალურად რეაგირებენ. დღეს React-ის გარეშე  ვებსაიტის დამზადება თითქმის წარმოუდგენელია. ისეთი პლატფორმები, როგორიცაა Netflix, Airbnb, Instagram და თავად Facebook – ამ სახით რეაქთის გარეშე ვერასოდეს იარსებებდნენ.  Meta-მ ამით ორმაგ მოგებას მიაღწია: საკუთარ თავს უსწრაფესი პლატფორმა შეუქმნა, რომელიც მომხმარებელს საიტზე “აჯაჭვებს”, ინტერნეტს კი დინამიკური სიცოცხლე აჩუქა, სადაც ვირტუალური სამყარო რეალურივით სწრაფია…

Google: სიჩქარის კულტი და SEO-ს ძალაუფლება

თუ Meta იმაზეა პასუხსიმგებელი, თუ როგორ გამოიყურება და რეაგირებს ჩვენს ქმედებაზე საიტი, Google-მა განსაზღვრა, რამდენად სწრაფად და ეფექტურად უნდა მუშაობდეს ის შიგნიდან. გუგლიის წვლილი ინტერნეტის განვითარებაში ბევრად უფრო დიდი და ღრმაა, ვიდრე უბრალოდ საძიებო სისტემის შექმნა. მათი მთავარი დამსახურება ინტერნეტის მაქსიმალური ოპტიმიზაცია და “დაჩქარებაა”.

ტექნოლოგიური თვალსაზრისით, Google-ის ერთ-ერთი უმნიშვნელოვანესი წვლილი V8 JavaScript engine-ის შექმნაა. ეს არის მაღალეფექტური ძრავა, რომელიც Google Chrome-ში JavaScript კოდის ოპტიმიზაციასა და მის მანქანურ ენაზე სწრაფ თარგმნას უზრუნველყოფს. სწორედ ამ ინოვაციამ მისცა ბრაუზერებს შესაძლებლობა, ისეთი რთული მონაცემები დაამუშავონ, როგორიც მანამდე მხოლოდ ლოკალური პროგრამებისთვის იყო დამახასიათებელი. ამ მძლავრ ბაზაზე დაყრდნობით შექმნა კომპანიამ Angular-იც – პლატფორმა, რომელიც React-ის პარალელურად, რთული და მასშტაბური ვებ-აპლიკაციების მთავარ საყრდენად იქცა. შედეგად, დღეს ბრაუზერში მძლავრი გრაფიკული რედაქტორები, ვიდეო პლატფორმები და ვიდეოთამაშები შეუფერხებლად მუშაობს. ამ ნაბიჯით Google-მა ბრაუზერი უბრალო ინტერფეისიდან მრავალფუნქციურ სამუშაო გარემოდ აქცია.

რაც შეეხება ბიზნესს, Google-მა წესების ერთობლიობა შექმნა: ვებსაიტი სწრაფი, უსაფრთხო და მობილურ მოწყობილობებზე მორგებული უნდა იყოს. ამ სტანდარტებმა კომპანიები აიძულა, თავიანთი ციფრული პროდუქტები გაეუმჯობესებინათ, რადგან სწორი SEO ოპტიმიზაცია დღეს ხილვადობისა და მომხმარებელთან კომუნიკაციის მთავარი წინაპირობაა. ამ სტრატეგიით, გუგლმა ისეთი მასშტაბური ეკოსისტემა შექმნა, სადაც ხარისხიანი ინფორმაცია მთავარ ბიზნეს-აქტივად იქცა. კომპანიამ საკუთარი პოზიციები ინტერნეტის მთავარი ინტელექტუალური ფილტრის როლში გაიმყარა, ციფრულ სამყაროს კი სტრუქტურა, მაღალი წარმადობა და მუშაობის ის სტანდარტები შესძინა, რომლებსაც დღეს ნებისმიერი წარმატებული ვებ-პლატფორმა ეფუძნება.

Amazon: გლობალური ინფრასტრუქტურა და ღრუბლოვანი ტექნოლოგიები

Amazon-ის ისტორია იმის კლასიკური მაგალითია, თუ როგორ შეიძლება ერთმა კომპანიამ სრულიად შეცვალოს გლობალური ინდუსტრიის წესები. ის, რაც 90-იან წლებში წიგნების პატარა ონლაინ მაღაზიით დაიწყო, დღეს ციფრული სამყაროს უხილავ, მაგრამ ყველაზე მძლავრ მამოძრავებელ ძალად იქცა. კომპანიამ მოახერხა ის, რაც მანამდე შეუძლებლად ჩანდა: საკუთარი შიდა პროცესების ოპტიმიზაციისთვის შექმნილი რესურსები გლობალურ სერვისად აქცია.

ხშირად გვავიწყდება, რომ ინტერნეტი მხოლოდ ვირტუალური სივრცე არაა – ის ფიზიკურ ადგილს და ენერგიას საჭიროებს.  Amazon-მა, თავისი AWS (Amazon Web Services) პლატფორმით, ინტერნეტის ნამდვილი “ხერხემალი” შექმნა. სანამ Amazon ღრუბლოვან ტექნოლოგიებს დაამკვიდრებდა, ნებისმიერი კომპანიისთვის საიტის გაშვება დიდ სირთულეებთან იყო დაკავშირებული: სერვერების ოთახები, გაგრილების სისტემები, ძვირადღირებული აპარატურა და IT სპეციალისტების მთელი არმია.

ამაზონმა ინფრასტრუქტურის დემოკრატიზაცია მოახდინა. მათ ეს ტექნოლოგიური მიღწევები ყველასთვის ხელმისაწვდომი გახადეს.  ამან მცირე ბიზნესებს  საშუალება მისცა, ზუსტად ისეთივე სიმძლავრე ჰქონოდათ, როგორიც გიგანტურ კორპორაციებს. AWS-ის წყალობით, ინტერნეტი მასშტაბირებადი გახდა. დღეს, თუ თქვენს საიტს ერთდროულად მილიონი ადამიანი ეწვევა, Amazon-ის სერვერები ავტომატურად გაფართოვდება, რათა ამ ნაკადს გაუძლოს…

სტატისტიკის მიხედვით, დღევანდელი ინტერნეტის თითქმის მესამედი (30%) სწორედ Amazon-ის ინფრასტრუქტურაზეა დამოკიდებული. ამ სტრატეგიით კომპანიამ უპრეცედენტო ფინანსური სტაბილურობა და ბაზრის კონტროლის ბერკეტები მოიპოვა, ხოლო გლობალურ ვებს უსაფრთხოების მაღალი სტანდარტი და ტექნოლოგიური ზრდის შეუზღუდავი შესაძლებლობა მისცა. დღეს წამყვანი ონლაინ-სერვისების უმრავლესობის ფუნქციონირება წარმოუდგენელია იმ ტექნოლოგიური გარემოს გარეშე, რომელიც ამაზონმა შექმნა.

დღეს მხოლოდ ვებსაიტის ქონა საკმარისი აღარ არის. თანამედროვე საიტი ან აპლიკაცია ცოცხალი ორგანიზმი უნდა იყოს, რომელიც ბაზრის მოთხოვნებზე რეალურ დროში რეაგირებს, შეფერხების გარეშე მუშაობს და მომხმარებელს საუკეთესო გამოცდილებას სთავაზობს.

თუ ისეთი პარტნიორი გჭირდებათ, რომელიც თანამედროვე, სწრაფი და ბიზნეს-მიზნებზე ორიენტირებული ვებ-პლატფორმის შექმნაში დაგეხმარებათ – მოგვწერეთ ან დაგვირეკეთ ნომერზე: 📞 032 2 47 07 70.  ჩვენ კარგად ვიცით, როგორ გამოვიყენოთ Meta-ს, Google-ისა და Amazon-ის მიერ შექმნილი საუკეთესო ტექნოლოგიები თქვენი წარმატებისთვის.