როდის უნდა განაახლო ვებსაიტი?

1. მომხმარებლების ცუდი გამოცდილება (Bad UX) 

თუ მომხმარებლებს თქვენს ვებსაიტზე ნავიგაცია უჭირთ, რთულია სასურველი ინფორმაციის პოვნა ან კონკრეტული მოქმედების შესრულება (მაგალითად, პროდუქტის შეძენა), ისინი სწრაფად დატოვებენ მას. რთული სტრუქტურა, გაუგებარი მენიუ და ნელი ჩატვირთვის სიჩქარე მომხმარებლის კმაყოფილებაზე უარყოფითად მოქმედებს და ე.წ. "Bounce Rate"-ს (ვებსაიტიდან სწრაფად გამოსვლის მაჩვენებელი) ზრდის. ვებსაიტის გამარტივება და ოპტიმიზაცია ნავიგაციას აუმჯობესებს და მოქმედებების შესრულებას ამარტივებს, რაც მომხმარებლებს თქვენს ვებსაიტზე უფრო დიდხანს აჩერებს.

2. არ არის ადაპტირებული სხვადასხვა მოწყობილობებისთვის 

დღესდღეობით, მომხმარებლების უმეტესობა ინტერნეტს მობილური მოწყობილობებით იყენებს. თუ თქვენი ვებსაიტი სხვადასხვა ზომის ეკრანებზე ადაპტირებული  არ არის, პოტენციური კლიენტების მნიშვნელოვან ნაწილს დაკარგავთ. ცუდი მობილური გამოცდილება, საძიებო სისტემებში თქვენს რეიტინგზეც პირდაპირ აისახება. მაგალითისთვის, მობილურზე მორგებულ ვებსაიტებს, გუგლი, უპირატესობას ანიჭებს და ძიების შედეგებში მაღალ პოზიციებზე აყენებს.

3. მოძველებული დიზაინი და ვიზუალი 

ციფრული ტრენდები სწრაფად იცვლება. თუ თქვენი ვებსაიტი 4-5 წლის წინანდელია, დიდი ალბათობით, მისი დიზაინი მოძველებულად გამოიყურება. არათანამედროვე ვიზუალი, მოუხერხებელი ფონტები და ფერების შეუსაბამო კონტრასტი მომხმარებელში არასანდოობის განცდას აჩენს და მათ თქვენი კონკურენტების ვებსაიტებისკენ უბიძგებს. ახალი, თანამედროვე დიზაინი დაგეხმარებათ, თქვენი ბრენდი უფრო პროფესიონალურად და აქტუალურად წარმოაჩინოთ, რაც მომხმარებლის გადაწყვეტილებაზე პირდაპირ იმოქმედებს. 

4. მოძველებული ტექნოლოგიები 

ვებ-ტექნოლოგიები მუდმივად ვითარდება. მოძველებულ პლატფორმაზე აგებული ვებსაიტი შეიძლება ნელი, არასაიმედო და კიბერშეტევების მიმართ დაუცველი იყოს. ახალ ტექნოლოგიებზე გადასვლა ვებსაიტის სისწრაფეს და უსაფრთხოებას  აუმჯობესებს, თქვენ კი საშუალებას გაძლევთ, თანამედროვე ფუნქციები დაამატოთ, როგორიცაა ინტერაქტიული ელემენტები, უსაფრთხო გადახდის სისტემები და მონაცემთა დაცვის უახლესი პროტოკოლები.

5. საძიებო სისტემებში არ ჩანხართ 

თუ თქვენი ვებსაიტი, თქვენი საქმიანობისთვის რელევანტური საკვანძო სიტყვებით, Google-ის საძიებო სისტემის პირველ გვერდზე არ ჩანს, ეს ნიშნავს, რომ პოტენციური მომხმარებლები უბრალოდ ვერ გპოულობენ. 
ვებსაიტის განახლება შესანიშნავი შესაძლებლობაა SEO (Search Engine Optimization) სტრატეგიის გადასახედად და გასაუმჯობესებლად. განახლების პროცესში შესაძლებელია, ვებსაიტის სტრუქტურის ოპტიმიზაცია, რელევანტური საკვანძო სიტყვების ინტეგრირება და ტექნიკური SEO-ს გამოსწორება. ეს კი თქვენს ონლაინ ხილვადობას მნიშვნელოვნად გაზრდის.

 

6. თქვენი მიზნები შეიცვალა 

ბიზნესი დინამიური პროცესია. მას შემდეგ, რაც თქვენი ვებსაიტი შეიქმნა, შესაძლოა, თქვენი კომპანიის გეგმები, სამიზნე აუდიტორია ან პროდუქტები/მომსახურებები შეიცვალა. ვებსაიტზე ეს ცვლილებები უნდა აისახოს და თქვენი ამჟამინდელი ბიზნეს სტრატეგიის შესაბამისი უნდა იყოს. განახლებული ვებსაიტი დაგეხმარებათ, ახალ სამიზნე აუდიტორიას დაუკავშირდეთ და თქვენი საქმიანობის ახალი მიმართულებები ეფექტურად წარმოაჩინოთ.

 

7. კონკურენტების ვებსაიტები უკეთესია 

დაათვალიერეთ თქვენი კონკურენტების ვებსაიტები. თუ ისინი უფრო მოგწონთ, რადგან თანამედროვე, ფუნქციური და მომხმარებელზე მორგებულია, ე.ი. კონკურენტული უპირატესობა დაგიკარგავთ. მომხმარებლები ყოველთვის იმ კომპანიას აირჩევენ, რომელიც მათ საუკეთესო ონლაინ გამოცდილებას შესთავაზებს. 

ვებსაიტის განახლება არა მხოლოდ იმაში დაგეხმარებათ, რომ კონკურენტებს დაეწიოთ, არამედ გაუსწროთ და თქვენს სფეროში ლიდერი გახდეთ.